Plantun de Prouvènço

Pèr coumpara dos planto d'encò nostre

Cirsium ferox & Pinguicula vulgaris

Guihèn

Cirsium ferox

Asteraceae Compositae

Àutri noum : Bartalai, Bartarai.

Nom en français : Cirse féroce.

Descripcioun :
Aquéu poulit bartalai o guihèn di flour blanco flouris mai tardié dins l'an que soun cousin. Se recounèis peréu à si cambo de flour sènso espino. Coumpara emé lou bartalai que ié sèmblo proun aleva la coulour.

Usanço :
Dèu èstre manjadis coume soun proche cousin Cirsium vulgare (de vèire à sa ficho).

Port : Grando erbo
Taio : 40 à 150 cm
Fueio : basalo
Tipe bioulougico : Emicriptoufite
Cicle bioulougico : Planto renadivo

Gènre : Cirsium
Famiho : Asteraceae
Famiho classico : Compositae
Tribu : Cardueae
Ordre : Asterales

Coulour de la flour : Blanco
Petalo : >6
Ø (o loungour) enflourejado : 2 à 5 cm
Flourido : Estiéu - Autouno

Sòu : Ca
Autour basso e auto : 0 à 1200 m
Aparado : Noun
Remarco : Endemico Prouvènço e Itàli
Juliet à óutobre

Liò : Tepiero seco - Camin
Estànci : Subremediterran à Mountagnard
Couroulougi : Mediterrano-Mountagniero-Nord
Ref. sc. : Cirsium ferox (L.) DC., 1805

Erbo-grasso

Pinguicula vulgaris

Lentibulariaceae

Noms en français : Grassette commune, Langue-d'oie.

Descripcioun :
L'erbo-grasso trachis en mountagno, sus cauquié, dins li riéusset e àutri relarg bagna. Es uno planto carnivoro que pòu aganta de bestiouno emé si fueio pegouso à bord envertouia. Se destrìo de si cousino, mens coumuno, que si flour soun plato emé uno taco blanco sus li petalo que li bord soun pas gaire net.

Usanço :
Li fueio soun couneigudo pèr caia lou la, parié qu'en Suèdo se n'en servien. S'adoubo un sirop purgatiéu que sèrt peréu pèr gari contro lis escarto de pèu. Aro s'atrobo en fitouterapìo pèr sougna lou tussi (espetouranto), li mau de garganto e apasima li nèrvi. S'adoubo en tisano, 20 g de fueio emé de mèu e de jus de limoun. Pamens la planto èi proutejido dins d'ùni relarg.